ꌋꐓ，ꈯꌩꈯꇓ、ꈬꉙꈬꃪꉬꇮꌕꃅꌕꈈꀕ，ꃰꊿꀀꃅꌒꄮꇬ，ꉠꉌꃀꐝꍠꀕ，ꉪꇐꀋꃷꎵ，ꎺꇁꋧꃅꐞꁧꈍꑋꈓꐛꀐꌠꀊꂵꄀ。ꀊꂵꇫꐥꑴꌦꄮꇬꈿꆈꏬꏿꄉ，ꋍꈓꋒꀋꋒꈾꏾꃬꏢꃐ，ꈾꂷꀱꋓꀕꇬꎷ。ꉪꅷꄚꑟꇬꆏ，ꀊꂵꐛꑊꉠꑓꋪꇬꐛꇁ，ꄇꃅꄇꇖꀕꇫꎍ。

ꉠꎺꏣꇬꀊꂵꆹꑊꑍꒊꆭꀕ，ꀊꅰꁱꀋꐭꌗꀋꅐꑠꂷ。ꄚꋍꃅꐨꑽꑌꇬꄉꉜꎼꇁꇬ，ꀊꂵꆹꉂꑟꅑꂷꉬꌠꈀꄸꑌꅉꐚ。ꋍꃢꋑꀋꋒꋠꅍꅝꒉꍈꇫꎍꑲꆏ，ꋍꊨꏦꑴꅉꆏꋠꀋꀬꅝꀋꀬꃅ，ꋌꁸꌊꉪꊈꇖꑳꇖꂵꈧꌠꍈꇬꎷ，。ꋌꀄꊭꃅꋍꑍꇯꆐꈬꉘꁡꇤꄉꑘꃅꊖꑣꅷꃀꌠꄮꇬꑟ，ꐥꍂꃅꌶꅉꇬꑌꄉꄯꒉꀘꀋꋻꌠꉨꁱꂷꀋꌧ。ꐩꋊꀉꆹꊬꌠꇬꄉꅑꅸꀋꃅꑟꌠ，ꎭꇁꅧꌠꈍꑋꋌꊝꋺꀋꐚ，ꉌꎭꑘꀕꈍꑋꋌꉙꋺꀋꐚ，ꇵꂷꈍꑋꅐꋺꀋꐚ，ꑓꁴꈍꑋꊰꋺꀋꐚ。ꄚꑠꃅꑴꇬ，ꀊꂵꆹꊨꏦꎭꃆꎭꂮꋋꈨꌌꊾꂷꂲꆾꄉꉉꀋꋻ。ꉢꎺꅸꇁꇬ，ꀊꂵꆹꐥꍂꃅꏦꎫꇤꍤꁧꀋꋻ，ꄸꀋꁧꉪꊇꁡꇤꂶꌠꂯꅐꁧꀋꋻ。ꑠꐛꅹꉪꁡꇤꇬꊿꀉꑌꄹꁆꆹꊿꌦꑷꆅ、ꑮꑟꅪꏷꄮꇬꀉꄂꊾꈬꆈꄅꀕꅉꇬꄉꉠꀊꂵꌋꆀꐮꂿꄎ。ꋌꀋꉬꑲꆏ，ꀊꂵꆹꋍꑍꇀꅉꀕꃅꋍꊨꏦꁍꑗꃄꅉꇬꄉꋙꊪꒉꏽ、ꋚꁧꀨꎸꐺ，ꀋꉬꀐꇬꐷꈭꐷꇜꇬꄉꃮꋚꃬꋚꄐ，ꇤꈫꇤꇋꏮꄉꋚꃅꒉꑽ。ꉠꀊꂵꆹ1935ꈎꒆꌠ，ꑠꄮꇬ，ꉪꊇꁍꇩꌢꎭꇤꅠꀕꄮꉬꑴꌦ。ꀎꋏꀉꁌꈧꌠꉉꇬ，ꀊꋨꄮꇬꈀꄸꄰꑌꋚꇮꒉꃪ，ꆀꃅꇖꈋꃰꊿꇫꐥꌠꋠꂊꈚꊸꑠꁯꇬꀋꋦ。ꋠꅍꆹꑸꑽꌋꆀꈾꃚꀉꄂꐥ，ꇢꄮꁨꑲꆀꎷꐚꋠꄎꄷ。

ꀊꂵꎭꋻꅧꋺꐛꅺ，ꈀꄸꑌꏭꀋꋌꃅꈪꑌ。ꀋꃅꀃꑍꋋꄮꁍꇩꐞꄿꃰꊿꐥꃅꌒꄮꇬ，ꑞꋠꏾꑞꋠ，ꑞꅝꏾꑞꅝ。ꃮꎸꋠꏾꋠ，ꎭꃃꅝꏾꅝꀐꑴꇬ，ꀊꂵꐥꍂꃅꋚꂷꀕꌌꁧꈿꀋꋻ，ꋍꃢꋑꀋꋒ，ꋙꍈꊰꃄꅉꅞꇬꂯꋌꉅꈂꀸꊐꄉꋠꇬꎷ。ꀋꄸꄷ，ꉪꊇꇖꑳꇖꂵꈧꌠꀊꂵꄰꄉꋙꋠꇈꋚꈧꌠꉪꊇꌌꁧꈿꇬꆹ，ꀊꂵꇨꇅꃃꇈꉪꊇꋌꌌꋍꃢꉙꂘꌠꉬ。ꋌꄹꇬ：“ꋚꂷꀕꈝꃀꏃꏢꁮ，ꃰꊿꇵꂷꈍꑋꅐꑲꆀꋚꎔꋍꍔꊌꄎ，ꑠꅺ，ꉪꊈꈀꄸꑌꌣꈚꌢꎭꀋꐥꃅꋚꂷꀧꌋꃅꌶ”ꄸ。ꋋꈭꐨꆏ，ꉪꊈꀉꑳꈧꌠꑌꀊꂵꌷꄉꈪꑌꇔꍣꃅꋚꂷꀧꌋꃅꀐ，ꄷꀋꁧꎆꃀꆿꂷꑠꏎꏸꄉꌬ。

ꀎꋏꇐꀳꇬ“ꀿꐰꌺꈩꌒ，ꁍꐮꇖꈩꌒ”ꄷꀋꐯꐤꀋꁨ，ꋍꃢꋑꀋꋒꌶꅉꇬꄉꀱꇁꑲꆏ，ꉡꆹꉌꇿꑓꇿꃅꇁꌊꉠꀊꂵꅍꄉ，ꀊꂵꇇꀨꄉꃮꋚꃬꋚꄐ、ꋚꃅꒉꑽ。ꀋꎺꇁꀋꉆꌠꆹꎭꃃꀊꂵꏬꄉꑠꍔ，ꈍꄮꑌꅿꉗꌑꐩꀕ，ꀋꅝꉈꉩꀕ。ꀃꃀꂮꄷꆏ，ꉢꀥꀊꂵꄰꁧꇬꎷ，ꋋꆹꑞꑌꀋꃅꈁꌒꄉꀕꑳꂾꌩꇵꉅꌊꎭꃃꏬꉢꄎ。ꎭꃃꋋꍔꅝꌐꇬꆏ，ꉠꀃꃀꂊꊫꀕ，ꉠꇭꀧꑌꊷꆣꀕꀐ。

ꋍꑍꑘꀋꃅ，ꊰꑋꋚꀋꋠ。ꑋꅐꑋꈌꁏ，ꑋꈌꉙꏦꀕꄮꇬ，ꂿꑘꁡꇤꆫꃅꂿꏿꀋꆷꃛ。ꉠꀊꂵꈎꀱꆪꊂꊛꃅꁍꑗꃄꅉꇬꄉꋙꊪꒉꏽ，ꎹꄓꃬꀮꈍꄮꄓꆏꀊꂵꈍꄮꄓ，ꈊꃀꏷꌺꈍꄮꈺꆏꀊꂵꄚꇱꈻ，ꎭꀋꐒ，ꅧꀋꐒ。ꉪꊇꋍꁯꋍꑷꋯꑌꃯꉻꃅꐮꐊꄉꈾꏿ，ꉪꏤꃤꏿꌐꈭꐩꆏꀊꂵꄰꃤꏿ。ꑋꊂꌕꆪ，ꃅꍛꁱꄷꆏ，ꀊꂵꆹꉢꋌꄖꌊꃄꅉꂿ，ꋍꊨꏦꑴꅉꆏꉠꊂꈹꄉꈾꂷꌋꆀꑭꌌꃄꅉꇬꁊ。ꃅꍵꃹꇁꋙꎴꒉꏡꄮꆏ，ꀊꂵꉣꑊꇁꌊꑳꐮꈾꏪꇬꄉ，ꆳꁏꑌꀋꑴ，ꉐꐙꑌꀋꑴꃅꈾꒇ，ꈾꒇꉊꈯꂴꆽꐊ，ꀊꂵꇖꑳꑋꐧꊭꈎꄉ，ꉊꈯꊂꈹꌊꀒꁨꉜꄉꒇꇬꎷ。

ꊁꇁꋍꑍ，ꉡꆹꌧꇐꊂꈹꆀꇁꉷꃅꏹ，ꉠꀊꂵꉣꑊꂿꇁꈧꄮꁨ，ꇢꄮꁨꑲꆀꀱꀁꇬꋍꏮꇁꄎ。ꌶꅉꐥꇬꄆꅇꀋꌌꄉ，ꀊꂵꇭꀧꆅꌠꉢꇫꅉꀋꐚ，ꀊꂵꈎꇁꆪꇁꄉꋧꃅꐞꁧꌠꂯꉢꇫꅉꀋꐚ。ꉢꅉꐚꄮꇬꆏ，ꑊꑍꒊꆭꀕꌠꀊꂵꆹꐥꍂꃅꏣꐞꑞꐞꁧ，ꋊꐞꃣꐞꁧꀐ。

ꃅꊸꅩꌬꀕꑠꑍ，ꉢꇁꌊꈾꏪꇬꑟ，ꈾꏾꃬꏢꃐ，ꈾꂷꀱꋓꀕ，ꈿꆈꋌꏬꆹꀊꂵꍸꇐꉬ。